Contoh Teks Pidarta Bahasa Bali "Danu Kerthi Gitaning Toya Ening"

Om Awignamastu Namo Sidham

Inggih, suksma aturang titiang maajeng ring pangenter acara Wimbakara antuk galah sane kapaica ring pasikian titiang.

Sadurung titiang nguningayang atur indik daging pidartan titiang, pinih rihin ngiring sareng sami ngaturang pangastungkara angayubagia maajeng ring Ida Sang Hyang Widhi Wasa melarapan antuk, nguncarang. Puja Panganjali, OM SWASTIASTU.

Inggih, Sane banget singgihang titiang, Ida Dane Manggala Adat Lan Manggala Praja Desa Adat Kubutambahan.

Maajeng Ring Dharma Dhiaksa Panureksa Wimbakara Mebahasa Bali  sane dahat wangiang titiang.

Maantuka, Ring Para Pamilet, punika taler Ida Dane sareng sami sane banget kusumayang titiang.

Inggih Ida Dane, titiang Ni Gusti Ayu Nilam Trisnawati, saking pengga yohani Sekehe Teruna Teruni Wira Remaja, Tukad Ampel, rumasa bagia ring manah saantukan ring galahe sane mabuat puniki presida polih kacunduk mesadu ajeng, ring Ida Dane sinamian ngeninin indik "Danu Kerthi Gitaning Toya Ening" sekadi bantang wicara Wimbakara Mapidarta Bahasa Bali ring sajeroning Desa Adat Kubutambahan warsa kalih tali due likur puniki.

Medulirin antuk unteng Wimbakarane punika titiang nunggilan antuk murdan pidartan titiang sane mamurda, "Ngewangun Danu Kerthi Anggen Nyujur Bantang Pasukertan Jagat Bali Ajeg.

Ida Dane sareng sami, yening pacang maosang antuk nyujur Pasukertan Jagat Bali Ajeg, punika panut kabobotin antuk pikayun sane becik miwah bebaosan lan parilaksana manut tatuek ajahan Tri Kaya Parisuda. Iraga perada setata ngaturang sembah subakti maajeng ring Ida Sang Hyang Paramakawi, menyama braya, utawi masemeton. Sagilik, Saguluk, Selunglung, Sabayantaka, Vasudhaiva Kutumbakam. Utamaning nyane, iraga peresida ngelestariang wewidangan iragane manut kadi ajahan Tri Hita Karana, sane kajiwa pramaning olih Agama Hindu.

Ida Dane sareng sami, indikan nyane, pastika Ida Dane sampun ngewikanin rikalaning jagi Nyujur Pasukertan Jagat Bali Ajeg, guru wisesane nenten surut- surut nyobiyahang Ring warga utawi kerama Bali indik ngaptiang program ipun, "Nangun Sat Kerti Loka Bali" melalui Pola Pembangunan Alam Semesta, Berencana, Berintegrasi, Berkepribadian, lan Menyeluruh Menuju Era Baru. Sane mapiteket,  mikukuhin lan ngaptiang kelestarian Jagat Bali.

Inggih punika, mangda warga utawi kerama Bali setata ngemanggihin Kerahayuan Sekala miwah Niskala, sekadi kasurat ring prinsip Tri Sakti Bung Karno, Berdaulat secara politik,  Berdikari secara ekonomi, miwah Berkepribadian secara Kebudayaan. Pamekas ipun mapaiketan pisan sareng Visi lan Misi Era Baru sajeroning nunggilang wewidangan, wewangunan, Tata kahuripan gumi Bali, Danu, Kerama miwah kebudayaan Bali sane medasaran antuk Tri Hita Karana.

Punika mawinan titiang ngaturang penyuksemaan ring guru wisesa lan para wicaksa wicaksana sane ngangganin Kesusastraan Basa Bali, paindikannyane sampun nunggilang,  Danu Kertih Gitaning Toya Ening sekadi unteng Wimbakara Mapidarta Bahasa Bali ring  Bulan Bahasa Bali,  warsane mangkin.

Ida Dane sareng sami pamekas nyane manut ring wewidangan Tatwa Hindu, Danu Kertih metu utawi rauh wecanane saking Bantes sajeroning Sad Kertih sane mearti Nenem Kesucian sane patut ke Ajegang. Minekadi Jana Kertih, Jagat Kertih, Samudra Kertih, Wana Kertih, Danu Kertih, miwah Atma Kertih, lan  sane mangkin titiang jagi meatur nguningayang indik Danu Kertih.

Ida Dane, mebaosan antuk Danu, Danu punika sekadi genah kaewitan pawetuan toya. Nika mawinan titiang nguningayang ring Ida Dane ngiring Iraga sareng sami Ngewangun Danu Kertih pinaka utsaha ngertiang Danu, utawi iraga ngelestariang genah pawetuan - pawetuan Toya "Tawar" utawi sumber - sumber mata air sekadi semer,  pasiraman utawi beji, pangkung, danu miwah sane lianan. 

Maindikan asapunika, pastika. Ida Dane sampun pawikan ring kegunaan, Toyane,  sane presida nguripang Jagat lan daging nyane sahaning sane maurip ring Jagat puniki.

Pamekasnyane, Utsaha sane presida keanggen nyalaran mangda kawentenan Danune setata Ening, lan Suci inggih punika, ngiring, iraga setata nyaga KERERESIKAN lan Kesucian pawitan utawi pawetuan Toyane miwah  palemahan nyane. Inggih punika  nenten Nyambehang Emis ring wewidangan Toyane, Ngewatesin antuk Jatma sane ngeliwat ring duur Danune,  Nenten ngerusak, utawi ngebah Taru ring panepi Danu, turmaning ngemargiang acara Melasti miwah ngaturang  Pekelem ring tengahing Danu. Sekadi cihna iraga ngaturan sembah subakti ring Ida Betara Betari sane malinggih ring tengahing Danu, sane sampun ngapaicayang toya sekadi angge kahuripan jagat lan dagingnya.

Lianan ring punika, iraga patutne ngewangun Parahiyangan ring wewidangan danu miwah ring genah pawetuan toya sane lianan. Inggih puniki tatojunnyane sekadi cihnan iraga bakti ring Ida Betara sane sampun mapaica toya miwah setata ngertiang lan ngelestariang toya sane mawit mangda setata suci.

Gunan nyane makesami punika, mangda,  iraga miwah Jagat Bali lan sedaging nyane ngamolihin Rahayu, Rahajeng, Sukerta Lan Ajeg. Ngiring iraga ngastiti bhakti ring Ida Sang Hyang Widi Wasa lan masikian sareng - sareng ngelestariang Dan utawi Toya Ening.

Yening Toyane puek turmaning saat medaging kekotoran lan Iraga nenten ngertiang tur ngelestariang paindikan Toya Ening punika, pastika iraga nemu pikobet, penyakit, sengkala utawi kabebrehan ring jagate sami, minekadi : Grubung Agung, Blabar Agung yenin masan sabeh, lan yening masan panes mangentak jagate pastika Tuh Giit, lan wanane nenten presida maurip utawi PADEM.

Antuka asapunika, malih pisan titiang ngaturin Ida Dane ngiring sareng sami masikian, nyaga kelestarian Toya Ening ring jagate puniki lan ngastiti bakti ring Ida Sang Hyang Widi Wasa mangda iraga sareng sami setata ngemolihin Rahayu Lan Rahajeng, Sekala miwah Niskala, Gemah Rimpah Loh Jinawi.

Yening iraga utawi kerama Bali Rahayu lan Rahajeng, Gemah Rimpah Loh Jinawi, pastika Pasukerta Jagat Bali Ajeg.

Inggih Ida Dane sareng sami,  Pamekas nyane, Ring Ida Dane para Dharma Dhiyaksa. Panureksa, sekadi asapunika titiang ngaturang nguningan paindik Ngewangun Danu Kertih Anggen Nyujur Bantang Pasukertan Bali Ajeg ring rahinane mangkin.

Inggih Ida Dane sareng sami,  sane wangiang titiang. 

Saking Badung ke Manggupura, numbas Ambet ring Petang. Kirang Langkung nunas geng Sinampura, antuk nambet titiang kalintang.

Inggih, maka pamuput sineb titiang antuk ngaturang Parama Santih.

Om Santih, Santih, Santih, Om

Puput, Suksme